KORONADAL CITY –Yara na sa kustodiya sang kapulisan ang duha ka ginakabig notorsyos nga mga drug pushers matapos nga maaresto sa ginpatigayon nga operason sa banwa sa Purok Mainuswagon, Barangay Benitez, Banga, South Cotabato.
Ginkilala ang mga naaresto nga sanday Alyas “Rico”, 42-anyos, soltero kag Alyas “Niel”, 53-anyos, may asawa, lunsay wala sang trabaho, kag mga residente sang Brgy. Improgo sa nasambit nga banwa.
Gin-aresto ang duha matapos nga madakpan nga nagabaligya sang illegal nga droga sang operatiba nga nagpakilala nga buyer.
Nakuha gikan sa mga suspek ang 40 ka dalagko nga pakete sang shabu nga may kabug-aton nga 205 gramo nga nagakantidad sang P1,375,000.
Magluwas sini, nakuhaan man sangn boodle money na tig-1,000 peso bill ang mga suspek.
Nahibaluan nga ang mga nadakpan ang anay na nga nagagamit sang ilegal nga droga kag ginpaidalom sa rehabilitasyon apang nagbalik ang ga ini sa ila nga bisyo.
Sa karon, nagapabilin ang mga ini sa lock up cell sang Bang PNP kag magapangatubang sang kaso nga paglapas sa Section 5 kag 11, Article ll sang RA 9165 ukon Comprehensive Dangerous Drugs Act of 2002.
Padayon naman ang pahanumdom sang mga otoridad nga likawan na ang pagduso kag pag-usar sang illegal nga droga bangud hugot sila nga magabantay agud madakpan ang sin-u-man nga mainvolbar diri.
