MAKILALA, COTABATO- Wala na sang kabuhi sang nasapwan ang isa ka menor de edad nga babaye nga ginapatihan biktima sang pagpanglugos sa Purok 2, Brgy. New Israel, Makilala, Cotabato.
Ini ang ginkumpirmar ni PCMS Ritchie Gesulga, imbestigador sang Makilala PNP sa interview sang Bombo Radyo Koronadal.
Ginkilala ang biktima nga si alyas Inday, 9-anyos kag isa ka Grade 3 pupil nga residente sang nasambit nga lugar.
Suno sa imbestigasyon sang Makilala PNP, tatlo na ka adlaw nga na-missing ang nasambit nga biktima humalin pa sang Nobyembre 23, 2024 sang hapon kag nasapwan na lamang pasado alas-6 kagab-i sa isa ka maligwin nga lugar nga malapit lamang sa sapa sa Purok 2 ,Brgy. New Israel sa nasambit nga banwa.
Suno kay Gesulga, nasapwan ini sang mga residente man sang lugar nga natabunan sang hilamon kag yara na sa state of decomposition na.
Natukiban nga may lagob sa ulo ang biktima kag ginahibalo pa sa karon kun ano ang gintunaan sang kamatayon sini.
Sa karon, may yara na sang tatlo ka persons of interest sa nasambit nga ginapatihan pagpanglugos sa biktima samtang napadayon ang pagtipon sang mga ebedensiya agud mapasabat ang mga suspek.
Gindala na ang lawas sang biktima sa Wood Funeral Home sa Brgy Manongol, Kidapawan City kag natalana nga ipaidalom sa post mortem examination.
