Ginpahayag ni Philippine National Police Chief Gen. Rommel Francisco Marbil nga gina-estudyohan ang posible nga pagpasaka sang kaso batok kay Vice President Sara Duterte.
Magluwas sa bise presidente, mapasakaan man sang kaso ang iya mga security personnel kag staff.
Ini bangud sa paglapas sa Artikulo 151 sang Revised Penal Code (Resistance and Disobedience to a Person in Authority) kag iban pa nga kriminal kag administratibo nga kaso.
May kaangtanan ini sa insidente sa House Detention Center kag VMMC, kon sa diin gingamit ang pribado nga ambulansya para sa “forced transfer” ni Atty. Zuleika Lopez, Chief of Staff ni Duterte, nga nakakulong sa contempt order sang Kongreso.
Ginpasalig ni Marbil nga mangin patas ang imbestigasyon kag pagsunod sa due process para mapasangkol ang sin-o man nga naglapas sa kasuguan.
Sa karon, wala pa sang sabat diri ang kampo ni VP Duterte, nga yara karon sa Mindanao.
