Ginapasiguro sang Department of Agriculture (DA) ang mga tikang agud masolusyonan ang mataas nga presyo sang manok kag itlog sa mga tindahan sa tunga sang mga reklamo sang mga poultry raiser nga ang pagnubo sang presyo sa mga uma wala nagasalamin sa presyo sa mga merkado.
Suno kay Gregorio San Diego, chairman emeritus sang United Broiler Raisers Association, nga ang presyo sang manok sa mga uma nagnubo sa P80 kada kilo, pero ang presyo sa mga tindahan nagalab-ot sa P220 kada kilo.
Suno pa kay San Diego nga ang mga Poultry raisers naga eksperyensya sang paglugi nga nagalab-ot sa P50 kada kilo bangud ang gasto sa produksyon nagalab-ot sa P105 tubtob P110 kada kilo.
Base sa pagmonitor sang DA sa mga merkado sa Metro Manila, ang presyo sang bug-os nga manok sa mga tindahan nagalab-ot sa P150 tubtob P220 kada kilo.
Dugang pa ni San Diego nga ang presyo sang itlog sa mga uma nagnubo sa 50 sentimos kada piraso pero ang presyo sa mga tindahan nagpabilin nga mataas.
Ang presyo sang medium-sized nga itlog sa mga tindahan nagalab-ot sa P8 tubtob P9 kada piraso.
