Ginarekomendar sang House Committee on Good Government and Public Accountability sa Department of Justice (DOJ) nga magpagwa sang lookout bulletin order (LBO) batuk sa pito ka opisyal sa idalum sang Office of the Vice President (OVP) angut sa imbestigasyon sa ginaalegar iregularidad sa paggamit sang confidential funds sang tuig 2022 kag 2023.
Ginhimo sang chairman sang komite nga si Manila 3rd District Representative Joel Chua ang sushestyon matapos wala magsapol sa una nga pagpatawag ang natungdan nga mga opisyal.
Kalakip sa mga ini sanday OVP Chief of Staff Zuleika Lopez; Assistant Chief of Staff kag Chair sang Bids and Awards Committee nga si Lemuel Ortonio; Direktor sang Administrative kag Financial Services nga si Rosalynne Sanchez; Special Disbursing Officer (SDO) nga si Gina Acosta; kag Chief Accountant nga si Juleita Villadelrey.
Ginapatawag man sang komite sanday anay DepEd assistant secretary Sunshine Charry Fajarda kag SDO Edward Fajarda, nga sandig sa report yara na sa karun sa OVP.
Sa sulat ni Chua kay DOJ Secretary Jesus Crispin Remulla, nasaad diri nga nakabaton sila sang impormasyon nga posibli magbiya sa pungsod ang nasambit nga mga indibidwal agud likawan ang imbestigasyon sang Kamara sa confidential funds sang OVP.
