Ginatun-an na sang Department of Justice (DOJ) ang posibilidad nga indi lamang pagpang-bully ang rason sa likod sang pagpangluthang sa isa ka eskwelahan sa Tacloban City kundi posible man nga may kaangtanan ini sa ginatawag nga Nihilistic Violent Extremism (NVE).
Suno kay DOJ Spokesperson Polo Martinez, ginatun-an sang departamento kon may impluwensiya ang online content sa mga estudyante nga nalakip sa insidente, pareho sang mga naitala nga school shootings sa Estados Unidos, lakip na ang Columbine High School massacre sang 1999.
Nagguwa man sa social media nga ang isa sa mga suspek ang nakasuksok sang T-shirt sang KMFDM, isa ka banda nga nahisugtan sa pila ka school shooting incidents sa Amerika.
Ginpahayag man ni Martinez nga beripikahon anay sang mga awtoridad ang edad sang duha ka estudyante nga nalakip sa insidente paagi sa mga dokumento pareho sang birth certificates kag dental records antes magdesisyon kon may ipasaka nga kaso batok sa ila.
Dugang pa niya, ipaidalom man ang mga menor de edad nga nalakip sa isa ka masinsinan nga juvenile intervention program nga ipatuman sang lokal nga panguluhan.
