Target sang gobyerno nga mangin casualty-free ang palaabuton nga Mayo 2025 nga eleksyon.
Suno kay Department of the Interior and Local Government (DILG) Secretary Juanito Victor “Jonvic” Remulla, ginmanduan ini ni Pangulong Ferdinand Marcos Jr nga trabahuon ang kaluwasan kag seguridad sang mga kandidato kag publiko para sa nagahilapit nga piniliay sa pungsod.
Luyag sang gobyerno suno kay Remulla nga wala sang mangin kaswalidad kag mangin matawhay ang piniliay.
Sa pihak nga bahin, base sa inisyal nga assessments, ang mga lugar nga mahimo kabigon bilang hotspots sa 2025 elections amo ang Bangsamoro Autonomous Region in Muslim Mindanao (BARMM), Cagayan, Nueva Ecija, kag Palawan.
Apang gin-athag sini nga indi pa pinal ang desisyon angut diri bangud padayon pa nga ginabantayan ang sitwasyon sa magkatuhay nga mga lugar.
Tun-an man sini suno kay Remulla kun mahimo may ma assign nga isa ka patrol sang pulis sa tagsa ka mga kandidato sa pagka alkalde para sa ila seguridad. Indi mag serbi ang mga ini nga bodyguards, sa baylo, maga monitor lang kag maga antad sa mga kandidato.
