Nagahingyo ang mga hog raisers sa Rehiyon 12 sa mga lokal nga gobyerno nga ipatuman ang uniform floor price para sa mga liveweight hogs agud maprotektahan ang mga local raisers sa manubo nga presyo nga ginatanyag sang mga manugbakal, negosyante, kag middleman.
Sa interview sang Bombo Radyo Koronadal, ginpahayag ni Arnel Barroso Jr., presidente sang Titans Hog Raisers Region 12, ang executive order nga ginpaguwa ni Mayor Leonard Escobillo sa banwa sang Tampakan, South Cotabato—nga nagabutang sang minimum nga presyo sa pagbaligya para sa buhi nga mga baboy—isa ka tikang nga may dako nga bulig.
Madumduman sang Nobyembre 4, nagpaguwa ang LGU Tampakan sang Executive Order No. 4 nga nagatukod sang mga minimum buying prices.
Gin-athag ni Barroso nga ang polisiya ang nagahatag sa mga hog raisers sang maathag nga basehan sa pagtalana sang presyo, sa baylo nga batunon lang ang ano man nga presyo nga ginatanyag sang mga bumalakal.
Ginhatagan niya sing igtalupangod nga ang implementasyon sini nga polisa sa Tampakan naghatag na sing positibo nga mga resulta, bangod ang iban nga mga bumalakal indi makabakal sing mga baboy sa manubo nga presyo nga ila gintinguhaan anay nga ipatuman sa mga manugsagod.
Bangud sini, nagapanawagan si Barroso sa iban pa nga mga alkalde sa Rehiyon 12 nga mag-adoptar man sang kasubong nga polisa. Ini magatukod sang isa ka tayuyon nga sulundan sa presyo para sa mga buhi nga baboy sa bug-os nga rehiyon kag makabulig sa mga lokal nga manugsagod sang baboy nga mapadayon ang ila palangabuhian.
