Nagpakita sang dako nga demonstrasyon sang international collaboration ang Armed Forces of the Philippines (AFP) kaupod ang mga pwersa sang militar sang Australia, Japan, New Zealand, kag United States, paagi sa isa ka adlaw nga Multilateral Maritime Cooperative Activity (MMCA) sa Exclusive Economic Zone (EEZ) sang Pilipinas, September 28, 2024.
Nalakip sa mga lugar nga nasakop sang MMCA amo ang West Philippine Sea sa diin ginpakita ang enhanced exercises nga gindisenyo agud nga maimprobar ang ‘interoperability’ sang mga nag-upod nga mga pwersa.
Parte sang mga aktibidades ang pre-sail briefings, communication exercises (COMMEX), cross-deck exercises, division tactics/officer of the watch (Divtacs/OOW) drills, photographic exercises (PHOTOEX), replenishment at sea (RAS) approaches, maritime domain awareness (MDA) exercises, kag contact reporting.
Lunsay gindisenyo ang mga ini agud nga hanason pa ang kahandaan sa operasyon kag kapasidad sa pagbinuligay sang nasambit nga mga pungsod sa tion nga may magluntad nga kinagamo.
Nagadugang subong ang Pilipinas sang training engagements kaupod ang foreign partners kag pagpabaskog sang defense agreements sa mga ini sa tunga sang nagalala nga pagkaagresibo sang China sa West Philippine Sea.
Ginabalewala sang China ang 2016 arbitral ruling nga nagabasura sang ila malapnagon nga pagpang-angkon sa South China Sea sa diin parte sini ang West Philippine Sea.
Ginabasol sang mga Chinese sa Pilipinas, United States kag iban pa nga Western nations ang tensyon sa nasambit nga area.
