Opisyal na ginpahayag sang Samahang Basketbol ng Pilipinas (SBP) ang 12 ka players nga magarepresentar sa Gilas Pilipinas para sa ikalima nga window sang FIBA Basketball World Cup 2027 Asian Qualifiers sa Malaysia.
Magapanguna sa lineup ang bag-o nga naturalized player nga si Bennie Boatwright, upod ang mga nagabalik nga players nga sandigan sang national team nga sanday Rhenz Abando kag Kai Sotto.
Makita man sa final roster sanday Quentin Millora-Brown kag Mike Phillips, nga wala nakapartisipar sa ikaapat nga window bangud sa mga injury.
Ginabug-usan ang 12-man lineup nanday Chris Newsome, Dwight Ramos, AJ Edu, Kevin Quiambao, Juan Gomez de Liano, Cjay Perez kag Scottie Thompson.
Isa sa mga ginapaabot nga pagbalik sa national team amo si Abando, nga ang katapusan nga pagpakigbahin sa Gilas amo pa ang 2023 FIBA Basketball World Cup nga gin-host sang Pilipinas.
Magaatubang ang Gilas Pilipinas sa Syria sa Nobyembre 27 kag sa Iran sa Nobyembre 29 kun sa diin pagahiwaton ang duha ka hampang sa Karisma Arena sa Seremban, Malaysia.
Ginalauman nga ipakita sang Gilas ang mas mabaskog nga preparasyon kag teamwork sa sini nga bahin sang kwalipikasyon agud mapabakod ang ila kampanya para sa 2027 FIBA Basketball World Cup.
