Ginaistoryahan subong sang publiko ang kontrobersiyal nga children’s book nga ginsulat ni Vice President Sara Duterte nga gintig-uluhan nga “Isang Kaibigan” matapos matukiban sang netizens nga kaanggid ini sang libro nga “Owly Just a Little Blue” nga ginsulat naman sang American author nga si Andy Runton.
Ang “Owly Just a Little Blue” ang ikaduha nga libro sa graphic novel nga Owly series ni Runton sa diin nagalibot ang istorya sini sa pispis nga kwago nga si Owly.
Sa istorya, natukiban ni Owly kag sang abyan sini nga isa ka ulod, nga may pamilya sang bluebird nga nagaistar sa guba nga puno sang kahoy kag ila ini ginbuligan nga makahimo liwat sang bag-o nga pugad. Wala nangin mahapos kay Owly nga makig-abyan sa natumod nga pamilya sang pispis apang nangin determinado sia ilabi na sang nag-abot ang isa ka bagyo.
Samtang, sa libro nga “Isang Kaibigan” nga ginpahayag mismo ni VP Duterte nga sia ang orihinal nga nagsulat, nagalibot man ang istorya sa isa ka pispis nga kwago nga naguba ang pugad matapos ang isa ka bagyo apang ginbuligan sia sang isa pa ka pispis nga iya naman nga nangin abyan.
Bangud nga indi maglayo ang kaundan sang duha ka children’s book kag daw kaangay nga ginbaylo lang ang mga papel sang mga karakter, nagapati ang mga netizens nga kinopyahan lang sang bise presidente ang iya nga libro.
Matandaan nga ang libro ni Duterte ang ginhalinan sang ila pagbaisay ni Senator Risa Hontiveros sa Senate hearing sa ginahingyo sang opisina sang Office of the Vice President (OVP) nga budget para sa masunod nga tuig 2025.
Suno sa OVP, magabalor sang P50 ang printing sang kada kopya sang natumod nga libro gani nagahingyo sila sang P10 million agud nga maka-print sang tubtob 200,000 ka mga kopya sini.
Ginpahayag naman ni Professor Danilo Arao – UP Professor, madamo sang mga gramatical errors ang nasambit nga libro kag mdalom ang mga tinaga nga indi man suno pa angkop sang mga lamharon ang kaisipan.
Nagpaguwa naman sang statement si VP Sara kag ginpahayag nga pagpang-guba sang imahe sini ang pahayag nga nangopya lamang ini sang libro.
