Nakumpiska sang mga elemento sang 1st Mechanized Battalion ang siyam ka mga matag-as nga kalibre sang armas sa mas ginpahugtan nga operasyon batuk sa pagpanguha sang mga loose firearms kag paglagas sa mga armado nga grupo sa ila nga nasakupan.
Suno kay Lt. Col. Robert F. Betita, pinuno sang 1st Mech Bn, nagpatigayon sang operasyon ang ila mga tinawo sa Sitio Madanding, Brgy Angkayamat, Sultan Sa Barongis, Maguindanao Del Sur makaligad makabaton sang report nagikan sa mga residente.
Kalakip sa mga narekober sang militar ang mga masunod: isa ka 5.56mm, M16A1 rifle; isa ka 5.56mm, Ultimax rifle; duha ka Cal .30, Garand rifle; duha ka 7.62mm, M14 rifle; isa ka Cal .50 Barret, isa ka RPG launcher, GL, 40mm, M79; mga magasin kag nagkalain-lain nga sahi sang mga bala.
Magluwas sini, narekober man sang mga suldado ang yara sa 12 ka mga IDs, isa ka ATM Card, tatlo ka bandolyer kag mga sling bag.
Una na nga nagpaandam si Major General Antonio G. Nafarrete PA, Commander sang 6ID kag Joint Task Force Central sa mga nagauyat sang indi lisensyado nga armas nga magsungka sa mga otoridad bangud magapadayon man ang ila paglagas sa mga ini.
