Nagluntad ang tensyon sa tunga nanday Vice President Sara Duterte kag Senador Risa Hontiveros sa hearing sang Senate finance committee angot sa 2025 budget sang Office of the Vice President nga nagabalor sang Php2.037 subong nga Martes, Agosto 20.
Kalakip sa mga nangin sentro sang ila nga sabtanay ang mga assistance program sang OVP nga suno kay Hontiveros may kasubong nga programa sa iban nga ahensiya sang gobyerno partikular na sang Department of Health (DOH) kag Assistance for Individual in Crisis Situation (AICS) sang Department of Social Welfare and Development (DSWD).
Depensa naman sang bise presidente nga napolitika ang pondo halimbawa na lang kun maghingyo sila sa DSWD sang AICS, masami nga ginasabat nga indi pwede bangud gikan sa OVP nga kaaway sa politika.
Samtang, napamangkot man ni Hontiveros ang ginlunsar ni VP Sara sang nagligad nga tuig nga isa ka libro nga may tinaga nga “isang kaibigan” kun diin may pangalan ini sa atubangan sang libro.
Nagakantidad ini sang 10 milyon piso rason nga luyag ni Hontiveros nga ipaathag sang bise presidente kun para sa diiin ang programa kag sin-o nga mga estudyante ang pagahatagan sa remote communities.
Diri kag nag-init si VP Sara kag ginpahayag nga isa ini ka halimbawa sang “politicizing” ang pagpamangkot ni Hontiveros.
Gin-insister pa ni Hontiveros, nga simple lamang ang iya nga pamangkot angot sa libro nga ipanagtag sa mga bata apang pabalik-balik nga ginapahayag sang bise presidente ang “politicizing”.
Diri man kag nag-init si hontiveros kag ginpahayag nga indi manami ang ginapakita nga batasan ni VP Sara
Nagsabat man si VP Sara sa pahayag ni Hontiveros kag ginmensiyunar nga wala niya man maluyagan ang batasan sang senadora kadungan sang pagbalik lantaw sang natabo sang nagligad nga eleksiyon nga naghingyo ini sang bulig sa Davao City.
Nangin referee kag nagpatunga sa pagbaisay sang duha si Senadora Grace Poe nga amo ang chairman sang Committee on Finance.
Apang, na-refer na sa plenaryo sang Senado ang ginaduso nga pondo sang OVP para sa madason nga tuig.
