KORONADAL CITY – Yara na sa kustodiya sang mga otoridad ang apat ka mga kalalakihan matapos nga mabalabagan sa checkpoint sa siyudad sang Koronadal ang salakyan sang mga ini kag natukiban ang karga nga nagkalain-lain nga armas luthang nga wala sang lisensiya.
Sandig sa impormasyon gikan sa Koronadal City PNP, nagapatigayon sang synchronized checkpoint ang mga otoridad kadungan sang selebrasyon sang T’nalak festival sa bahin sang PCP 1, Barangay Namnama, Koronadal City sang gin-flagged down sang mga ini ang isa ka Toyota Fortuner nga puti nga may plate number AAM 2675.
Sa pagpapundo sang salakyan, nakit-an sang mga otoridad ang mga matag-as nga kalibre sang armas nga bitbit sang apat ka mga sakay sini.
Gilayon nga ginpangayuan sang nagakaigo nga dokumento ang mga suspek apang wala sang may napakita gani gin-arestar ang mga ini.
Ginkilala ang mga naaresto nga sanday Dante Mamalinta Mangudadatu, 54-anyos, may asawa kag residente sang Barangay Mayo, Columbio, Sultan Kudarat; Johamidin Kamid Minandang, 30-anyos ; Allan Ayob Bansulat, 29-anyos, nga lunsay mga residente sang residente sang Barangay Elbebe, Columbio, Sultan Kudarat kag isa ka Freddie Salla Lanao, 29-anyos nga residente sang Barangay Polomolok, Columbio, Sultan Kudarat.
Narekober sa mga ini ang mga masunod: 1unit sang Bushmaster M16 rifle; 1 unit sang HK 416 D M16 rifle;1 unit sang Colt caliber 45; 1 unit sang Armscor 45 caliber; 1 unit sang SAM shooters; 1 unit sang caliber 45 with CN 122133; 10 magazines sang 45 caliber; 17 magazines sang M16 rifle; 500 cartridge cases sang 5.56mm; 75 cartridge cases sang caliber 45; 2 bandoliers; 1 pc beltbag; 2 ka sling bags kag mga cellular phones.
Natalana naman nga pasakaan sang nagakaigo nga kaso ang mga naaresto nga suspek.
Kaupod sang Koronadal Ciy PNP sa pagpatigayon sang checkpoint ang RMFB-12, 1st SCPMFC, SCPIU, RID 12, RSOG 12 kag South Cotabato HPU 12.
Nahibaluan nga hugot nga seguridad ang ginapatuman subong sang mga otoridad sa South Cotabato bangud sa pamahog sang pagpamomba kadungan sang kafiestaan.
