KORONADAL CITY – Lunsay “Political matters” lamang suno pa ang natabo kun ngaa may yara sang paglainay sang bout sa tunga ni South Cotabato Governor Reynaldo Tamayo kag mga miembro sang Bangsamoro Grand Coalition (BGC).
Ini ang nangin pahayag ni South Cotabato Governor Reynaldo Tamayo angot sa pagpaguwa sang pahayag ni Maguindanao Del Sur Governor Bai Mariam Sangki Mangudadatu sang Sabado sa Grand Coalition General Assembly (BGC) sa Bongao,Tawi Tawi sa diin ginaalegar sini nga ginahilabtan ni Governor Tamayo ang pang-genobyerno kag politika sa Bangsamoro Autonomous Region in Muslim Mindanao (BARMM).
Suno kay Governor Tamayo, wala man ini sang tuyo nga malain sa BARMM sa baylo gindayaw pa niya ini bangud sa maayo nga pagdumala sang mga ministro kag mga opisyal sa BARMM.
Apang, suno sa Gobernador, bilang presidente man sang Partido Federal ng Pilipinas (PFP) may katungod ini nga magpulong sa iya nga mga miembro sa bilog nga Pilipinas sa diin lakip man sa partido si Maguindanao Del Sur Governor Bai Mariam Sangki.
Gin-athag pa sini nga may mando nagikan kay President Ferdinand Marcos nga magkreer sang alliance ang PFP sa Union of Bangsamoro Justice Partice (UBJP) sa BARMM Region bilang Political chief sang Presidente sa ila partido.
Ginklaro man sang gobernador nga indi siya ang kontra sang BGC bangud gina sunod lang sini ang mga mando nagikan sa Presidente.
Wala man suno pa sang malain kun ipaidalom sa audit ang mga LGU bangud nagakadapat gid man ini sa ginagasto nga kwarta nagikan sa pundo sang gobyerno.
