KORONADAL CITY – Wala sang dapat nga kabalak-an sa transmission sang Query ukon Q fever sa mga baka kag kanding sa siyudad sang Koronadal matapos ang nareport nga madasig nga depopulation kag condemnation sa tanan sang infected sa iban nga lugar sa pungsod.
Ini ang ginpahag ni Dr. Charlemaigne Calo, City Veterinarian sang siyudad sa interview sang Bombo Radyo Koronadal.
Suno kay Dr. Calo, kinahanglan nga maghalong batuk sa nasambit nga makalalaton nga sakit sa mga sapat bangud mabudlay kun masudlan ang siyudad ilabi na nga alagyan ang aton lugar.
Nahibaluan nga may ginpatigayon nga depopulation sa tanan nga na-impeksiyon nga kanding kag baka sa Pampanga kag Marinduque sadtong Biyernes sa surveillance areas nga sulod sa 500-meter radius sang infected site.
Nag-angkon man sang koordinasyon sa Department of Health kaangtanan sa epekto sang balatian sa ikaayong lawas sang tawo agud masiguro nga wala sang maapektuhan.
Nagapatigayon naman sang surveillance kah contact-tracing efforts sa mga indibidwal kag kasapatan.
Sa karon, wala pa sang kumpirmado nga human case sa pungsod sang Q fever.
Base sa impormasyon kaangtanan sa Q fever, ini ang isa ka zoonotic disease nga dala sang Coxiella burnetii bacteria nga nagapanguna nga nagaigo sa mga tupa, baka, kag kanding, apang mahimo man maglaton sa tawo pinaagi sang kontak sa naimpeksyon nga sapat ukon ila excreta ukon lawas kag birthing fluids.
Mahimo ini nga magdala sa tawo sang lagnat, pagkurog, kag pagpalanakit sang joints kag sa tion nga indi gilayon mabulong posible magdevelop sa komplikasyon sa liver kag tagipusuon.
