KORONADAL CITY – Nakapanagtag na sang bulig ang lokal nga panggamhanan sang Norala sa mga nangin apektado sang El Niño phenomenon.
Ini ang nangin pahayag ni Mayor Clemente Fedoc sa interview sang Bombo Radyo Koronadal.
Suno sa alkalde, ginkaisahan na sang Sanggunian Bayan sang nasambit nga banwa agud nga mausar ang ila nga pondo para sa mga apektado nga mga residente kag mga mangunguma.
Magluwas pa diri, kabug-usan nga 14 man ka barangay sini ang naga antos bangud sa kainit sang panahon lakip na ang ginakabig sini nga permanent crops parehas sang palm oil, saging , coconut, mangga kag palay.
Una na nga nagpaguwa sang P 1.5M ang ila nga banwa nga gingamit sa rice assistance sa mga apektado nga mga pumuluyo.
Aminado naman ang alkalde nga manubo ang balor sang assistance bangud dyutay lamang ang calamity fund sini.
Ginabulunta naman sang alkalde nga nag-abot na sa minilyon ang danyos sang El Niño Phenomenon sa ila nga banwa labi na sa sektor sang agricultura.
