-- ADVERTISEMENT --

Ginpamatud-an liwat ni US President Donald Trump ang suporta sang Estados Unidos sa Pilipinas kag iban pa nga mga kaalyado nga pungsod sa Southeast Asia, kadungan sang pagpasalig man nga direkta siya nga magapalab-ot sang bulig kun may mag-tuhaw nga problema.

Sa iya mga pahayag sa ASEAN-US Summit sang Nobyembre 17, ginsilingan ni Trump si Presidente Ferdinand “Bongbong” Marcos Jr. nga ang kaangtanan sa tunga sang duha ka pungsod nag-uswag, nga ginpabakod sang ila personal nga kaangtanan.

Ginhatagan man niya sing importansya ang pagpasangkad sang kooperasyon sa depensa sa tunga sang Pilipinas kag Estados Unidos, nga nagapasalig nga ang suporta sang Amerika sa iya mga kaalyado bug-os—100%.

Nag-joke man ini nga mahimo man tinguhaan sang Presidente nga tawgan si US Secretary of State nga si Marco Rubio, apang kon indi makasabat gilayon si Rubio, dapat tawgan sia sing direkta sang Presidente sa baylo.

Dugang pa ni Trump, sa pagyaguta, nga iya pahalinon si Rubio kon indi niya pagsabaton ang panawagan sa nagakaigo nga tion.

Ginhatagan man pagtamod sang Presidente sang Estados Unidos ang isa ka bag-o nga pag-updanay sa depensa sa tunga sang Amerika kag Indonesia, subong man ang mga kasugtanan sa negosyo upod sa Malaysia, Cambodia, kag iban pa nga mga pungsod sa Asya.

Gindugang pa, ginsulit ni US President Trump ang pagpromisa sang Washington sa pagsuporta sa soberanya, seguridad, kag kauswagan sang mga pungsod sa bug-os nga Bagatnan-sidlangan nga Asya kag sa rehiyon sang Indo-Pacific.