KORONADAL CITY – Ginakabig nga case close na ang kaso sang isa ka grade 4 pupil sang Balisong Elementary School sa banwa sang Tupi, South Cotabato nga ginapatihan ginlugos anay antes ginpatay.
Ini ang ginpahayag ni Police Major JS Pedrosa, hepe sang Tupi Municipal Police Station sa interview sang Bombo Radyo Koronadal.
Suno kay Pedrosa, ang prime suspect nga si Ronald Sayosa, 44-anyos, may asawa kag residente sang Purok Riverside, Sitio Lemblisong, Barangay Kablon, Tupi, South Cotabato ang ginakabig may kahimuan sang krimen bangud may testigo mismo nga nakakita sa iya malapit lamang sa lugar kun sa diin nasapwan ang bangkay ng 10 years old.
Ginpaathag pa ni Pedrosa nga matapos masapwan ang bangkay sang bata si Mr. Sayosa ang nangin subject sang hot pursuit operation tubtob sa naaretso ini kag gindala sa Police Station.
Apang, pagkabuwas sa wala ginalauman nga sitwasyon sang ginpaidalom sa booking process ang suspek nang-agaw ini sang armas kay PCMS Dexter Barreto, custodial facility in-charge/desk officer.
Natabuan naman nga ginbisita sang provincial director ang Tupi MPS agud hibaluon ang update sa natabo apang nasaksihan sini ang pag-agaw sang armas nga nagtulod sa iya agud nga luthangon ang suspek.
Matapos nga maluthangan ang suspek, gilayon ini gindala sa hospital apang gindeklarar nga patay na.
Sa pihak sini, indi naman kumbinsido ang pamilya Sayosa nga nangagaw sang armas ang suspek kag nagbato sa pulis.
Samtang, una naman nga ginkundenar sang Department of Education South Cotabato Division ang hitabo.
