KORONADAL CITY- Patay ang mataas nga lider sang Bangsamoro Islamic Freedom Fighters-Karialan faction (BIFF-Karialan) nga si Mohiden Animbang alias Kumander Kagui Karialan kag ang 11 pa nga katapo sang ila grupo kasunod sang engkwentro batok sa militar sa Barangay Kitango, Datu Saudi Ampatuan, Maguindanao Del Sur.
Ginkumpirma ini ni Major General Alex Rillera, commander sang Joint Task Force-Central kag ni Mayor Datu Saudi Ampatuan.
Pila ka tuig na nga wanted si Karialan kag sunod-sunod man ang operasyon sang militar batok sa iya bangud ang iya grupo ang ginakabig nga kaalyado sang Islamic State of Iraq and Syria (ISIS) terror group kag isa ka daku nga pagpamahog sa seguridad sang banwa.
Pila ka adlaw na suno sa militar nga ila ginasundan ang ruta sang terror leader apang naatrasar ang pursuit operation bangud nagalikaw man ang mga soldado nga masulod ang teritoryo nga kontrolado sang Moro Islamic Liberation Front (MILF).
Sang nag-abot na sa ila talaguan sa Barangay Kitago, nagsugod ang engkwentro halin 6:00 sa aga kahapon sang aga kag naglawig tubtub sa hapon.
Ang nagpanguna sa operasyon amo ang tropa sang 1st Brigade Combat Team ni Brig. Gen. Jose Vladimir Cagara samtang si Cagara naman ang nagserbe nga ground commander.
Nagdangat man sa13ka high-powered firearms ang nakuha gikan sa napatay nga mga rebelde.
Nahibaluan nga ang grupo nga Karialan ang ginatudlo nga responsable sa pagpamomba kag pag-atake sa tropa sang gobyerno kag may kahilabtanan man sa mga kalakasan sa Bangsamoro region.
