KORONADAL CITY- Radyo ang nagapabilin nga pinaka-epektibo, pinakamadasig kag pinakamasangkad nga pamaagi sang komunikasyon humalin sang una tubtob subong.
Sa exclusive interview sang Bombo Radyo Koronadal kay Mr. Fruto “Boss Nonong” Sumagaysay, anay radio broadcaster kag station manager sang Bombo Radyo Koronadal, kadungan sang selebrasyon sang World Radio Day, iya ginpahayag nga sa pihak sang mga pagpanghangkat, ang radyo ang nangin mabakod nga salandigan sa bilog nga kalibutan sa pila na ka dekada.
Suno sa iya, masaligan ang radyo bangud real-time ang pagdala sang impormasyon ilabi na sa tunga sang nanuhay-tuhay nga hitabo sa palibot sang pungsod kag kalibutan.
Ginpahayag ni Sumagasay nga sa pihak sang bag-o nga teknolohiya nga nagtuhaw subong nga panahon, wala nagtulog ang radyo kag nagpa-ulihi kag sa baylo, ini ang nag-adopt, nag- innovate kag nangin bukas sa pagbaton sang bag-o nga mga ideya sa pagbalita.
Humalin sadto suno sa natungdan, sakripisyo nga dako ang dala sang radyo kag tubtob subong, ginagamit man ang panibag-o nga social networking sites agud mas mapasangkad ang trabaho.
Nagapati siya nga bisan sa ano man nga panahon, ang radyo ang magatindog sang mabaskog sa gihapon.
Ginapanginbulahan niya man nga nangin kabahin siya sang Bombo Radyo sa pagpanguna sa paghatag sang First, Fast kag Right nga balita sa pila na ka dekada nga pagserbisyo kag isa man ini ka rason kung ngaa nangin manami ang iya nga career bangud sa radyo.
