KORONADAL CITY– Nakapagkit sang isa ka kaso sang filariasis ang syudad sang Koronadal matapos ang ginpatigayon nga outreach program sa nagligad nga sabado kaupod ang IPHO- South Cotabato, sa Sitio El Nalam, Barangay Assumption, Koronadal City.
Ini ang ginkumpirmar ni Doc. Vincent Ende, City Health Officer sang Koronadal sa interbyu sang Bombo Radyo Koronadal.
Suno sa Doktor, isa lang ang nagpositibo sa Filiarasis sa 38 ka mga indibidwal nga nagpaidalum sa nocturnal blood smearing test para sa sini nga balatian. Ginhambal sini nga may tsansa pa nga mag-ayo ang nagpositibo tungod wala pa sang pagbag-o sa iya sini nga kalawasan.
Dugang pa sini, nga ang sakit nga filariasis may sintomas pareho sang pagdalagku sang tiil, suso sa kababaihan kag bayag sa kalalakihan.
Madumduman nga sang nagligad nga tuig 2013 gindeklarar na nga filariasis free ang Koronadal apang suno kay Baroquillo indi makaapekto ini nga kaso sa kasamtangan nga estado sang Syudad.
