KORONADAL CITY- Nasapwan nga wala sang kabuhi kag yara na sa state of decomposition ang lawas sang isa kag 16-anyos nga babaye sa bahin sang isa ka bakante nga lote sa Purok Malinawon, Barangay San Isidro, General Santos City.
Positibo nga ginkilala sang mga ginikanan sini ang patay nga lawas nga si Jazdel Gabayeron, 16-anyos nga taga- Barangay Mabini, Koronadal city.
Nakilala ini bangud sa iya nga relo sa iya nga kamot kag uniporme sang SPED.
Suno sa impormasyon nga nakita sang bombo Radyo Koronadal, nakita ang patay nga lawas sang biktima sang isa ka bata nga ginsugo lamang nga mangita sang dahon sang sili malapit sa isa ka kubo sa bakante nga lote sa lugar.
Tupad sang patay nga lawas sang menor de edad ang .9mm nga armasluthang kag ang bag sini.
Sa subong naga padayon ang imbestigasyon sang mga otoridad sa nasambit nga insidente. Madumduman, nga ginhatod pa ini sa eskwelahan sang Enero 12, 2023 sang aga apang amu na gali ato ang ulihi nila nga tion nga makita nga buhi si Jazdel.
