KORONADAL CITY-Dead-on-arrival sa balay-bululngan ang ginapatihan nga close in bodyguard ni Mayor Bernie Palencia kag ang driver sini makaligad nga mangin biktima ang mga ini sa pinaka-ulihi nga serye sang pagpangluthang sa bahin sang national highway, Purok 8, Barangay Sulit, Polomolok, South Cotabato.
Ginkilala sang mga katapo sang Polomolok PNP ang mga biktima nga sanday Bonifacio Cabisada, 58, may asawa, kag isa ka retirado nga pulis nga si Jessie Arciete, alias “Loloy”, 56, may asawa, CSU member nga residente naman ng Purok Pag-asa, Barangay Silway 8, Polomolok, South Cotabato.
Naguwa sa imbestigasyon sang Polomolok PNP nga naga asoy ang duha ka biktima sa dalanon sakay nga ila nga mga motor kag padulong sa Polomolok sang hinali na lamang ang mga ini nga ginpagluthang sang wala pa mahibaluan nga mga suspek.
Nakaangkon sang mga igo sang bala halin sa wala pa mahibaluan nga sahi sang armasluthang ang mga biktima kabangdanan nga natumba ang mga ini sa kongreto nga dalanon.
Gintilawan pa nga dalhon sang mga otoridad ang mga biktima sa balay-bululngan apang wala na ang mga ini nakaabot nga buhi.
Madasig naman nga nagpalagyo ang mga suspek sa wala pa nahibaluan nga direksyon makaligad ang krimen. Wala naman sang motibo nga nakita sa subong mga kapulisan.
Naga padayon naman ang imbestigasyon sang mga otoridad sa nagluntad nga pagpangluthang.
