KORONADAL CITY – Wala na sang kabuhi sang masapwan ang isa ka mister sa sulod mismo sang ila puluy-an sa Purok Damsite, Barangay Saravia, siyudad sang Koronadal matapos ini nga maghikog.
Ini ang ginkumpirmar ni Barangay Kapitan kag ABC President Gregorio Presga sa interview sang Bombo Radyo Koronadal.
Ginkilala ang biktima kay alyas Jerry , 47-anyos, mangunguma, may asawa kag walo ka kabataan nga residente sang nasambit nga lugar.
Suno kay kapitan Presga, naguwa sa inisyal nga impormasyon nga nag-away kagab-i ang biktima kag asawa sini.
Kag kaina sang aga lamang sang naghalin sa ila puluy-an ang iya asawa nagpanarado ini sa ila kwarto kag ginbutangan sang lansawang ang pirtahana.
Nakibot na lamang ang mga bata sini sang makit-an nga nagabitay na sa sulod sang ila kwarto ang biktima nga nag-usar pa sang wire.
Bangud nga wala sang dalagko nga upod ini sa ila puluy-an, naghingyo sang bulig ang iya mga bata kag ulihi na ini nabuligan kag wala na madala pa sa hospital.
Sa karon indi pa gid mahibaluan kun ngaa ginhimo sang biktima ang paghikog apang nagbilin suno pa ini sang suicide note para sa iya asawa.
