KORONADAL CITY – Duha na ka indibidwal ang ginbawian sang kabuhi sa Soccsksargen region kadungan sang naeksperiensiyahan nga pagbubo sang mabaskog nga ulan dala sang bagyo nga Paeng.
Ini ang ginpahayag ni OCD-12 Information Officer Jorie Mae Balmediano sa interview sang Bombo Radyo.
Suno kay Balmediano, isa na ang napatay sa Kalamansig, Sultan Kudarat samtang isa naman sa Lake Sebu, South Cotabato.
Pagkalumos bangud sa malapnagon nga baha ang gintunaan sang kamatayon sang mga ini.
Samtang 736 ka pamilya ang nadisplaced sa ila nga mga panimalay bangud sa malapnagon nga baha tuga sang ulan.
Kabug-usan nga 70 ka barangay kag napulo ka LGUs sa bilog nga rehiyon-12 ang apektado.
Lubos naman nga apektado ang apat ka probinsiya kasubong sang Cotabato Province, Sarangani, South Cotabato kag Sultan Kudarat, mangin ang siyudad sang GenSan.
