KORONADAL CITY – Nagapadayon ang imbestigasyon sang mga otoridad sa nagluntad nga pagpamusil-patay sa isa ka persona kag pagkapilas naman sang isa pa sa national highway, Purok 1, Barangay Poblacion, Tupi, South Cotabato.
Ini ang ginpahayag ni PMSgt Rhea Gatinao, Information Officer ng Tupi PNP sa interbyu sang Bombo Radyo Koronadal//
Ginkilala ang napatay nga si Richard Cahilig Basilio, 40-anyos, may asawa, mangunguma samtang ang pilason nga biktima ang ginkilala kay Pierce Ram Ibrahim, yara sa legal nga edad kag residente sang Purok 2, Brgy. Palian sa nasambit nga banwa.
Suno kay PMSgt Gatinao, may nagreport sa police station sang insidente gani nagresponder sila sa lugar kag didto naabtan nga nakapaligo sang dugo ang biktima nga si Basilio nga may igo sang bala sa ulo.
Bangud sini, gilayon nga gindala sa Roel I Senador Memorial Hospital ang biktima apang ginsaylo man sa South Cotabato Provincial Hospital para sa dugang nga medikasyon apang ginbawian sang kabuhi.
Naguwa naman sa imbestigasyon sang kapulisan nga ulihi na natukiban nga may upod si Basilio nga pilason nga biktima nga gindala sa isa ka pribado nga hospital.
Sa karon, padayon ang ginahimo nga imbestigasyon sang Tupi PNP angot sa motibo kag kun sin-o ang responsable sa pagpangluthang sa duha ka biktima.
