KORONADAL CITY- Suspendido tubtob sa Oktubre 3, 2022 ang face to face classes sa Tampakan National High School (TNHS) makaligad nga magpositibo sa COVID 19 ang pipila ka mga estudyante kag manunudlo diri.
Ini ang ginpahayag ni Sir Ferdinand Estiban- Principal TNHS sa interbyu sang Bombo Radyo Koronadal.
Suno sa iya, positibo ang 5 ka Grade 10 students kag 1 ka manunudlo sa COVID 19 virus nga kung sa diin asymptomatic ang mga ini nga mga persona.
Ang mga nagpositibo sa sini nga virus ginapatihan nga asymptomatic bangud wala suno pa ini may ginabatyag apang pinaagi sa Expand Testing nahibal-an nga positibo ang mga ini.
Gilayon naman nga ginpaidalom sa testin kag quarantine period ang mga 200 ka mga estudyante kag mga manunudlo nga na closed contact sang mga nagpositibo sa nasambit nga sakit.
Samtang, temporaryo naman nga ginsuspende ang klase sa nasambit nga buluthuan agud nga malikawan man ang dugang pa nga mga kaso.
Bangud sa nasambit nga panghilitabo balik online kag modular learning anay ang mga estudyante sang TNHS.
