KORONADAL CITY- Walo ka mga preso sang South Cotabato Rehabilitation and Detention Center (SCRDC) ang nag-positibo sa ginhiwat nga panibag-o nga drug test.
Ini ang ginpaklaro ni Provincial Jail Warden Lory Celeste- South Cotabato Rehabilitation and Detention Center sa interbyu sang Bombo Radyo Koronadal.
Ginpahayag sini nga una nga nagpositibo sa drug test ang isa ka inmate nga nag apply sang plea bargaining kag ang pito naman ang nagpositibo sa ginhiwat nga random drug test sa sulod mismo sang presohan.
Dugang pa sini nga sa karun gina imbestigaran na nila ang walo ka mga preso agud nga mahibaluan kung paano nakasulod ang illegal nga druga sa sulod sang Provincial Jail sa pihak sang tuman sini nga pagpa strikto nga pagbantay sang mga jail guard.
Samtang kaangot man sini, isa ka jail guard sa karun ang ila man nga gina imbestigaran matapos nga masangkot ang pangalan sini nga posible isa man sa imbuldado sa illegal nga druga sa sulod sang provincial jail.
