KORONADAL CITY – Preparado na sa karun ang mga manunudlo sang isa ka buluthuan sa magabukas nga klase subong nga SY. 2022-2023 sa piyak sang gin-anunsyo ni Vice President kag Education Secretary Sara Duterte nga magasugod sa Agosto 22 ang klase apisar sang hingyu sang pila ka grupo nga magabukas ang klase sa Setyembre.
Ini ang ginpahayag ni Mr. Randy Pendilla- principal sa Concepcion National High School sa interbyu sang Bombo Radyo Koronadal.
Mahibaluan nga nakigbahin ang Vice President kag Education Secretary Sara Duterte-Carpio nga aprubado na ini ni Presidente Marcos kag iga-implementar na ini.
Nagpamatok man ang Teachers’ Dignity Coalition (TDC) nga magabukas na ang klase sa sunod nga bulan bangud kinahanglan sang mga manunudlo nga makapahuway kag makapreparar sa masunod nga school year.
Samtang, apisar ano man ang alert level status, magapadayun gihapon ang pagbukas sang klase sa tanan nga publiko kag pribado nga buluthuan sa tagsa ka education level kag iga-implementar ang in-person classes nga lima ka adlaw sa sulod sang isa ka semana sumugod Nobyembre 2 sa idalum sang Department of Education’s (DepEd) Order No. 34, series of 2022.
Mahimo nga makasugod sang full in-person classes sa Agosto 22 kag mahimo makapili kun five days of in-person classes; blended learning modality ukon three days sang in-person classes kag two days sang distance learning;ukon full distance learning sa tion sang “transition period” tubtob Oktobre 31.
