Nagapadayon ang imbestigasyon sang mga otoridad sa nagluntad nga pagpangluthang patay sa bahin sang Sitio Columbasinong, Brgy. Colongulo, Surallah, South Cotobato.
Sa interbyu sang Bombo Radyo Koronadal kay Jecelyn Mangompaos – ka live in parter ni Juan Pidoy .
Suno kay Jecelyn, ginkilala ang mga biktima ga amo sanday Juan Diangco Pidoy, 44 yrs old, may asawa, isa ka minero; Mark Anthony Laureño Pidoy, 22 yrs old, singlekag lunsay mga residente sang nasambit nga lugar kag si Jason Oga Mangumpaos, 32 yrs old, may asawa, mangunguma kag residente sang Brgy K’matu, T’boli South Cotabato.
Ginpahayag sini nga samtang nagainuman sa balay ni Jaun Diango Pidoy ang mga biktima, gulpi lamang nga nag abot ang isa ka grupo sang wala pa nakilal an nga mga armado nga naka suksuk sang itom nga uniporm kag naka bonnet kag gilayon nga ginluthang ang mga ini.
Nagbato pa kag gintistingan sang mga biktima nga maguwa sa ila nga puluy an apang wala ini nadayon bangud ginluthang ang mga ini sang suspek sa nagkalain lain nga bahin sang ila nga lawas nga nangin tunaan sang gilayon nila nga kamatayon.
Nagpakilala pa suno pa ini nga mga katapo sang mga PDEA.
Makligad ang insidente, gilayon naman nga nagpalagyo ang mga suspek sa wala nahibaluan nga direksyon.
Sandig naman sa gin imbestiga sang SOCO Team halin sa South Cotabato Provincial Forensic Unit kag ginproseso ang natabuan sang krimen kung sa diin narekober ang 20 ka piraso sang fired cartridge sang Caliber 45 kag isa ka fired bullet.
Sa karon nagapanawagan sang bulig ang himata sang biktima nga kung mahimo mahatagan man sila sang bulig pinansyal bangud nahibaluan nga ang mga napatay nga biktima ang mga bread winners sang ila pamilya.
Samtang sa karon ginkondena naman sang PDEA12 ang natabo sa pamilya Pidoy, kag ginpaklaro naman sang ila nga talatapan nga indi nila kaupdanan ang mga nasambit nga suspek.
