KORONADAL CITY – Patay ang mag-asawa matapos nga ginbungguan sang Toyota Wigo ang tricycle sang mga ini sa kalabaon sang National Highway, Purok 1, Brgy. Carpenter Hill, Koronadal City alas-2:45 kaina sang kaagahon.
Ginkilala ni PMSg Gandy T. Basan sang City Traffic ang mga biktima nga sanday Mangid Moncado Andalinog, 54 anyos, driver sang tricyle kag asawa sini nga Khems Andalinog, yara sa legal nga edad nga lunsay mga residente sang Sitio Atbangan, Tubeng, Tupi, South, Cotabato.
Naguwa sa imbestigasyon nga nagikan ang mag-asawa sa banwa sang Tupi kag padulong sa siyudad sang Koronadal sang pag-abot sa atubangan sang Toyota Wigo nga ginamaneho ni Francis Magluyag Lopez, 27 anyos nga residente sang Antipolo St/Odi St, Brgy. Zone II.
Sa kabaskog sang dalagan sang Toyota Wigo, nagtabog ang tricycle subong man ang mag-asawa nga sakay sini.
Bangud sa kabaskog sang impact nag-angkon sang madamo nga pilas sang mag-asawa nga Andalinog.
Nadala pa ang mga ini sa South Cotabato Provincial Hospital apang gindeklarar na nga dead on arrival.
Sa subong yara sa kustodiya sang kapulisan ang driver sang Toyota Wigo kag natalana nga magapangatubang sang nagakaigo nga kaso.
