KORONADAL CITY –Naglab-ot sa masobra isa ka libo nga mga anti-mining advocates ang nag-martsa halin sa Christ the King Cathedral tubotb sa atubangan sang kapitolyo sang South Cotabato agud nga ipanawagan kay Governor Reynaldo Tamayo Jr. nga e-veto ang ordinansa nga nagakakas na sa ban sang open pit mining sa probinsiya.
Suno kay Most Rev.Cerilo Casicas, DD, Obispo sang Diocese of Marbel, ang nasambit nga mga aktibidad ang pagpaklita sang pagkadismaya sa mga katapu sang Sangguniang Panlalawigan matapos nga gin-aprubahan “unanimously” ang pag-lift sa ban sa open pit mining sa probinsiya.
Indi lamang ang nagkalain-lain nga mga parokya sang Diocese of Marbel ang nag-upod sa solidarity walk kundi mangin ang nagkalain-lain nga sector kag religious organization lakip na ang mga kabataan kag mga pumuluyo sa South Cotabato nga disgusto sa ginhimo sang napulo ka mga katapu sang SP.
Samtang nagapatigayon sang programa sa guwa sang kapitolyo nakig-dayalogo ang Obispo kag mga kaupdanan sini sa gobernador sang probinsiya.
Naguwa man ang gobernador kag nag-atubang sa mga nag-martsa kag ginpromisa nga huna-hunaon pa sini sang maayo ang iya desisyon.
Ginpromisa man sini nga magadihon sang isa ka Technical Working Group (TWG) nga amo ang maga-evaluate anay sa igasumiter nga ordinansa sang Sangguniang Panlalawigan kun nasunod ang proseso sang ammendment sa Environment Code sang South Cotabato.
Nahibaluan nga wala pa sa opisina sang gobernador ang mga dokumento sang ordinansa gikan sa SP bangud ginbawi pa ini kag may kay-uhon pa.
Sa subong, nagalaum ang mga taga South Cotabato nga magpabilin ang ban sa open pit kag indi madayon ang operasyon sang Copper Gold project sang Sagittarius Mines Incorporated sa banwa sang Tampakan.
