KORONADAL CITY – Naglab-ot sa lima ka magkapamilya ang napatay samtang tatlo naman ang pilason sa pagkarambola sang tatlo ka salakyan sa Crossing Sulit Barangay Sulit, Polomolok, South Cotabato.
Ini ang ginpahayag ni Police Lt. Col. Verlin Pampolina, hepe sang Polomolok PNP sa interbyu sang Bombo Radyo Koronadal.
Ginkilala ang mga napatay nga sanday Emily Badilla, Shirley Lagos Badilla kag Ailene Valencia Badilla nga gindeklarar nga dead on the spot sa aksidente samtang patay man sa hospital sanday Leah Toble Badilla kag Lorlyn Olilia Badilla nga mga pasahero sang pick-up kag lunsay mga residente sang Arakan, North Cotabato.
Samtang, pilason naman ang driver sang pick-up nga ginkilala kay Alex Badilla, 54 anyos kag ang driver sang cargo truck nga nabungguan sini nga ginkilala kay Paquito Costan Dalipe, 60-anyos nga residente sang Barangay Apopong, General Santos City.
Sa imbestigasyon sang Polomolok PNP, nag-overtake’ ang pick-up sa isa ka salakyan kag wala sini makita ang nagliko nga cargo truck rason nga nabunggo sini.
Magluwas sa mga salakyan nga involbado sa aksidente, nalamita man ang isa ka motorsiklo apang nakaluwas naman ang driver sini.
Natalana naman nga pasakaan sang kaso nga reckless imprudence resulting to multiple homicide ang driver sang cargo truck sa nagluntad nga aksidente .
