SOUTH COTABATO – Liwat nga nagpatuman sang border lockdown ang lokal nga gobyerno sang South Cotabato sa tanan nga provincial boundaries kag magadugay ini tubtob September 15, 2020.
Sa ginpirmahan nga Executive Order No. 52 ni South Cotabato Governor Reynaldo Tamayo, Jr. nakabutang diri nga iya suno pa nga igasirado ang tanan nga mga kaiping nga probinsya ukon siyudad bangud sa padayon nga pagsaka sang mga numero sang mga kaso sang COVID 19 sa bug-os nga probinsya.
Sandig sa nasambit nga Executive Order, mga essential workers kag mga frontliners lamang ang ginapahanugotan nga makasulod sa South Cotabato.
Hugot man nga ginadumilian ang pagpaguwa sang mga vulnerable individuals kag may edad 20 anyos panubo, kag ginaobligar ang tanan nga magsuksok sang facemask kag face shield kun magaguwa sa ila panimalay.
Panawagan naman sang lokal nga gobyerno sang probinsya sa mga pumuluyo nga masami dal-on ang CCTS-card labi na kun magasulod sa mga establishmyento para sa mas madasig nga contact tracing kun makapagkit sang panibag-o nga positibo sa probinsya.
