KORONADAL CITY – Ginpaidalom na sa total lockdown ang Sitio Manerub sang Brgy. Pamantingan, Esperanza sa probinsya sang Sultan Kudarat makaligad makapagkit sang positibo nga kaso sang COVID 19.
Base ini sa ginpaguwa nga EO No. 63 sang lokal nga gobyerno sang nasambit nga banwa.
Apang ginpaathag ni Esperanza Municipal Health Officer Dr. Jilson Las Pinas, nga nag-negatibo sa swab test result ang mga ulihi nga nakaatubang sang nasambit nga nagpositibo.
Dugang pa sini nga magapabilin nila nga iga-quarantine ang mga nasambit nga nakasalamuha apesar negatibo na ang mga ini, bilang tikang agud malikawan ang pagkalaton pa sang balatian sa mga pumuluyo.
Ginpakigbahin man ni Dr. Jilson nga magapatigayon sang pagsinapol ang lokal nga gobyerno sang Esperanza para sa panibag-o nga measurement nga ila pagahimoon labi na nga may nagluntad nga pagpangluthang sa kaiping nga Brgy. Poblacion nga ginkapatay sang isa ka pulis kag ginkapilas sang tatlo nga iban pa.
Nagalaum ang opisyal nga padayon ang pag-ayo sang mga nakaatubang sang nasambit nga pasyente.
