KORONADAL CITY – Mas ginpahugtan sang mga otoridad ang seguridad sa bahin sang Purok Malipayon, Barangay Poblacion, Esperanza, Sultan Kudarat makaligad ang nagluntad nga pagpangluthang-patay sa isa ka pulis samtang ginkapilas naman sang tatlo ka tawo.
Sa eksklusibo nga interbyu sang Bombo Radyo Koronadal sa testigo nga si alyas Mae, nagluntad suno pa ang insidente pasado alas 11 sang aga kaina kun sa diin ginluthang sang wala pa natumod nga mga suspek sakay sang mga motorsiklo ang pulis nga si P Executive Master Sgt Arnold Paclibar samtang pilason naman ang upod sini nga si PSSg Chato Maycong nga lunsay naka-assign sa Esperanza Municipal Police Station.
Base sa imbestigasyon, hinali suno pa nga nagbunot sang armas luthang halin sa sling bag ang isa sa mga suspek kag ginluthang ang mga pulis sang gin-inspeksyon sang mga otoridad sa quarantine checkpoint sa nasambit nga lugar.
Magluwas sa mga pulis, pilason man ang barangay health worker nga si Josephine Danggan, kag barangay tanod nga si alyas Lanto.
GIlayon nga nagpalagyo ang mga suspek pakadto sa direksyon sang merkado pampubliko.
Sa subong nagapadayon ang hot pursuit operations sang mga kapulisan kasunod sang natabo.
