KORONADAL CITY – Yara na sa luwas nga kahimtangan ang isa ka iloy makaligad ini magbun-ag samtang nakasakay sa isa ka bongo sa bahin sang national highway Purok Pagkakaisa, Grino, Tacurong City.
Ginkilala ang nasambit nga babaye kay alyas “Reny”, 15 anyos kag residente sang Barangay New Cebu, Lambayong Sultan Kudarat.
Sa eksklusibo nga interbyu sang Bombo Radyo Koronadal kay Pilarin L. Latawan, driver sang Bonggo kag maninoy sang nasambit nga babaye, ginpahayag sini nga halin sila sa provincial hospital agud magpalantaw bangud sa pagpanalakit sang tyan sini apang ginpapauli sila bangud sa paglantaw sang doktor yara pa lamang sa 1cm kag 10 ka adlaw pa daw antes ini magabun-ag rason ginhatagan nalamang sila sang resita kag ginpapuli.
Apang sang papuli na sila kag yara sa dalanon hinali na lamang nagsakit ang tiyan ni alyas Reny kag naglupok suno pa ang panubigan sini kabangdanan nga napilitan si Latawan nga i-untat sa gilid sang dalanon ang nasambit nga salakyan.
Gilayon naman nagpangayo sang bulig ang tiya sang babaye nga si Risa Leal sa mga katawhan nga ila makit-an nga nagbulig man magtawag sang isa ka nurse nga malapit sa ila ginahamtangan.
Swerte naman kag nag-agi ang katapo sang Tacurong city PNP sa lugar kag ginbuligan sila nga idangat sa birthing home sang siyudad ang mag iloy agud mangin maayo ang kahimtang sang lapsag nga lalaki.
Suno naman sa midwife nga nag assist, normal ang vital signs sang duha magluwas na lamang sa timbang sang bata.
Nagpasalamat naman ang nasambit nga iloy mangin ang tiya sini sa mga nagbulig sa ila.
