KORONADAL CITY – Lauman suno pa sang mga pumuluyo sa banwa sang Surallah ang mas madamo pa nga mga raid batok sa mga establishmyento kag mga botika nga nagapamintaha sa tunga sang covid-19 crisis.
Ini ang hugot nga paandam ni Surallah Mayor Antonio Bendita makaligad ang ginpatigayon nga raid sang gintingob nga pwersa sang NBI, CIDG, FDA kag DTI batok sa Marqueezza Pharmacy nga ginareklamo nga overpricing sa mga sanitizer.
Suno kay Mayor Bendita, ginlunsar ang nasambit nga operasyon matapos nakabaton sang madamo nga mga reklamo nga tuman kamahal ang mga sanitizer nga ginabaligya sang nasambit nga botika.
Samtang magadistansiya naman ini sa igapatigayon nga imbestigasyon kag pagpasaka sang kaso sang NBI batok sa tag-iya sini agud mahatagan sang ligwa ang imbestigasyon sini.
Panawagan naman sini sa mga negosyante nga magtuman sa ginapatuman nga mga ordinansa kag layi agud makalikaw sa gamo.
