Emosyonal nga ginpakigbahin ni Nanay Annie Vegafreya, residente sang Barangay Moloy, Surallah, South Cotabato, ang daku nga pagkawala nga iya naaguman matapos mapatyan sang iya mga alagang baboy.
Napatay ang kadam-an sang iya mga baboy, lakip ang mga nayon kag 10 ka mga bata sini, matapos ini gulpi nga nagluya kag nag-untat sa pagkaon.
Suno kay Nanay Annie, gilayon niya nga ginreport sa mga otoridad ang kahimtangan sang iya mga baboy sang nagpakita ini sang mga sintomas sang pagluya.
Ginhatagan man ini sang bulong, apang wala gihapon nakaluwas ang mga kasapatan.
Sa kasamtangan, ginlubong na ang tanan nga napatay nga mga baboy bilang kabahin sang mga tikang sa pagpugong sang posible nga paglapta sang balatian.
Ginpahayag man niya nga tuman niya nga ginahalungan kag ginaatipan ang iya mga hinuptan nga baboy, gani dako gang iya kasubo bangud sang gulpi nga pagkawala sang mga ini.
Samtang, padayon ang inspeksyon sang mga otoridad sa mga napatay nga baboy pinaagi sa pagkuha sang mga blood sample agud mahibaluan ang matuod nga gintunaan sang insidente kag makumpirmar kon ano nga balatian ang nagtuga sang asod-asod nga pagkapatay sang mga kasapatan.
