Ginpahanumdom ni Atty. RJ Sustiguer ang publiko nga indi paghimuon nga instrumento para sa atensyon ukon viral content ang impeachment proceedings ni Vice President Sara Duterte, kundi tan-awon ini bilang seryoso nga proseso sang gobyerno.
Suno kay Sustiguer, President sang Integrated Bar of the Philippines (IBP) South Cotabato-General Santos City, ang impeachment trial isa ka oportunidad agud mas maintindihan sang publiko ang constitutional process, hustisya, kag pananagutan sang mga opisyal.
Sa interview sa Bombo Radyo Koronadal, ginpahayag ni Sustiguer nga nalipay siya nga nag umpisa na ang hearing bangud nagahatag ini sang patas nga kahigayunan sa depensa kag prosecution nga ipresentar ang ila mga panig.
Apang gin-admitar ni Sustiguer nga nangin mabudlay sundon sang ordinaryo nga publiko ang una nga semana sang hearing bangud sang tuman ka-legalistic nga mga diskusyon.
Bangud sini, ginpanawagan niya nga himuon ini nga higayon para sa pagtuon kag paghangop sa proseso sang gobyerno, sa baylo nga himuon lamang nga materyal para sa social media ukon kasikatan.
