KORONADAL CITY – Liwat nga nag-isyu ang lokal nga gobyerno sang Tulunan nga ipa-iway ang mga nakahan-ay na nga aktibidad para sa ila nga 58th Foundation Anniversary subong nga adlaw.
Sa esklusibo nga interbyu sang Bombo Radyo Koronadal kay Abraham Contayoso, Secretary ni Tulunan Mayor Reuel P. Limbungan ginpahayag sini nga nagre-issue sang Executive Order si Mayor Limbungan nga nagpahayag nga ikanselar ang pila nila ka mga aktibidad agud nga ang pondo para diri ang paga-usaron para sa panginahanglanon sang mga residente nga apektado sang linog.
Apang indi man suno pa dapat nga magligad ang ila kapistahan nga wala sang ginahimo nga pahalipay rason nga magapatigayon sila sang community program nga pagatambungan sang mga evacuees kag mangin man mga volunteers nga nagapatigayon sang stress debriefing.
Kagabi, nahagan-hagan man suno pa ang kasubo sang mga pumuluyo bangud sa ginpatigayon nga live band performance sa field kun sa diin nagapabilin sang mga residente.
Sa sini suno pa nga simple nga hilikuton, indi man malipatan sang mga taga-Tulunan ang ila kapyestahan kadungan sang ila pagpasalamat sa ila kaluwasan kag bulig nga nabaton makaligad ang na-eksperyensyahan nga asod-asod nga linog.
