KORONADAL CITY – Nagpahanumdom ang mga health officials kag mga doktor diri sa probinsya sang South Cotabato nga maghalong kasunod sang deklarasyon sang Department of Health may kaangtanan sa outbreak sa balatian nga polio.
Sa interbyu sang Bombo Radyo Koronadal kay Dr. Angelie Christine Marmonejo, isa ka pribado nga doktor, kalakip ang mga probinsya sang South Cotabato, Sarangani kag North Cotabato mangin ang Cotabato City nga ginakabig nga high risk sa nasambit nga balatian.
Suno kay Dr. Marmonejo, masami nga makuha ang ini nga balatian sa higko nga tubig kag indi pagpabilin sang katinlo sa lawas.
Kun indi suno pa ini masabat, posible nga magresulta ini sa pagkaparalisa halin sa mga sintomas kasubong sang trangkaso, pagpalanakit sang lawas, kag kawad-an sang gana sa pagkaon.
Gani agud malikawan ini, dapat nga magpabakuna batok sa polio virus, masami nga maghugas sang kamot, magpaligo kag siguruhon nga tinlo ang ilimnon nga tubig.
Nahibaloan nga liwat nga nagtuhaw ang nasambit nga balatian makaligad gindeklarar nga polio-free ang Pilipinas 19 ka tuig na ang nakaligad.
