KORONADAL CITY- Naghikog-patay ang isa ka lalaki sa banwa sang Tupi, South Cotabato makaligad nga mag-inom sang hilo.
Sa esklusibo nga interbyu sang Bombo Radyo Koronadal kay Pol Major Andres Sumugat Jr, hepe sang Tupi PNP ginkilala ang biktima nga si alyas Itizan, 52-anyos, may-asawa, care taker sang isa ka farm kag residente sang Brgy San Roque sa nasambit nga banwa.
Suno kay Sumugat, nagbakal suno pa sang pesticide ang biktima kag ini ang iya nga gin-inom kaina sang kaagahon nga nangin rason sang iya nga kamatayon.
Narekober naman sang kapulisan ang isa ka botilya sang hilo nga gin-usar ang biktima sa iya nga kamatayon.
Samtang suno naman sa himata sang bitkima nga si Alvin Batoy, ginkakibot na nga sang makit-an nga nagabura na ang iya baba kag wala na sang kabuhi.
Suno kay Batoy, antes paman naghikog ang bimtima kasubong nga wala na ini naga-istorya sa ila kag masami nga ginasirad-an ang iya sini nga bunkhouse.
Wala man suno pa sang nasugid nga problema ang biktima sa ila.
Sa karon, padayon pa nga ginahibalo kun ano ang nagtulod sa biktima agud nga maghikog kag ginahibalo man kun may yara sang nagluntad nga foul play.
