KORONADAL CITY – Natumbahan sang dako nga puno sang kahoy ang isa ka puluy-an kag tircycle sa Purok Center, Barangay Topland, Koronadal City pasado alas 4 kaina sang hapon kadungan sang pagbubo sang mabaskog nga ulan dala ang mabaskog nga hangin.
Sa interbyu sang Bombo Radyo Koronadal kay Barangay Kapitan Angelica Bermil, dako nga puno sang mangga ang natumba sa puluy-an ni Andresa Careñosa, 62 anyos nga isa ka balo.
Nahibaluan nga nagaisahanon lamang ang tigulang sa puluy-an sini sang natabo ang insidente.
Mangin ang nakapark nga tricycle nga ginamaniho sang bata sini ang natumbahan man.
Nasubuan naman ang pamilya bangud gina-arkilahan lamang sang bata ni Andresa ang nasambit nga tricycle.
Luwas naman ang tanan kun diin madasig nga nagresponder ang barangay agud mapatigayon ang clearing operation.
Nagpromisa naman si Kapitan Bermil nga pagabuligan nga makay-a ang puluy-an sang nasambit nga pamilya.
