KORONADAL CITY – Sorpresa nga gin-inspeksyon ni Koronadal City Mayor Eliordo Ogena ang Koronadal City Public Market kun diin nagapadayon ang konstruksiyon sang edifisyo nga tal-os matapos masunog sang tuig 2017.
Sa interbyu sang Bombo Radyo Koronadal kay Mayor Ogena, nakabaton ini sang mga report kag mga post sa social media nga kasubong wala nagahulag kag ginapabay-an ang pagpatukod sang public market rason nga nagkabalaka ini.
Bangud sini ginmanduan niya ang naga-construct sang public market nga padasigon ang pagtapos sini kag magsunod sa timeline nga gintalana.
Kaangot sini ginalauman nga sa Nobyembre 30 maka-saylo na ang mga nagapanag-iya sang stalls.
Ginhatagan punto sang alkalde nga luyag niya masolusyunan ang hingyo sang mga stall owners nga tuman na ang kalugian bangud sa kawad-an sang nagakaigo nga pwesto makaligad masunog ang palengke.
Dugang pa sang alkalde nga luyag niya nga mapanami ang merkado publiko sa syudad agud nga indi maulihi ang mga stall owners sang public market sa mga mall kag establisemento nga ginapatukod sa syudad.
Nahibaluan nga dako nga hangkat sa kasamtangan nga City administration ang pagdevelop sang merkado publiko.
