Padayon nga nagapalapit sa kadutaan sang naaminhan nga bahin sang Ilocos Sur ang Tropical Storm Maymay, suno sa pinakaulihi kag latest nga tropical cyclone bulletin sang Philippine Atmospheric, Geophysical and Astronomical Services Administration (PAGASA) nga ginpagwa alas-2 sang kaagahon subong nga Huwebes.
Base sa datos sang PAGASA, ang sentro sang bagyo ulihi nga nakita sa kadagatan sakop sang Magsingal, Ilocos Sur.
May bitbit ini nga mabaskog nga hangin nga nagaabot sa 75 kilometro kada oras malapit sa sentro kag pagbugso nga tubtob 105 kilometro kada oras, samtang nagahulag pasidlangan sa kadasig nga 10 kilometro kada oras.
Nagapabilin ang Tropical Cyclone Wind Signal No. 2 sa Ilocos Norte, Ilocos Sur, Abra, kag pila ka bahin sang La Union, Pangasinan, Apayao, Kalinga, Mountain Province, Benguet, kag Cagayan.
Samtang, yara naman sa idalom sang Signal No. 1 ang iban pa nga bahin sang La Union, Pangasinan, Apayao, Kalinga, Mountain Province, Benguet, Ifugao, mainland Cagayan, Isabela, Quirino, Nueva Vizcaya, kag pila ka lugar sa Zambales, Tarlac, Nueva Ecija, kag Aurora.
Suno sa PAGASA, ginapaabot nga mag-landfall ang Bagyo Maymay sa naaminhan nga bahin sang Ilocos Sur subong nga aga antes ini makatabok sa mabukid nga bahin sang Northern kag Central Luzon.
Ginapaabot man nga magaguwa ang bagyo sa sidlangan nga baybayon sang Isabela ukon Cagayan matapos ang pagtabok sini sa kadutaan.
Ginpahayag sang weather bureau nga magapabilin nga tropical storm ang Bagyo Maymay antes mag-landfall.
Apang posible ini nga magluya kag mangin tropical depression samtang yara sa kadutaan, kag mahimo man nga magdeklara bilang low-pressure area pagsulod sang hapon ukon gab-i bangud sa epekto sang mabukid nga terrain sang Luzon.
