Madinalag-on nga ginbuksan sang Colombia ang ila kampanya sa FIFA World Cup 2026 matapos nila madominahan ang bag-o nga team nga Uzbekistan, 3-1, sa ginpatigayon nga hampang sa Mexico City Stadium.
Kontrolado sang Los Cafeteros ang hampang sa pagpanguna sang ila star player nga si Luis Díaz.
Sang ika-40 minuto sang una nga bahin sang hampang, nakaiskor ang Colombian player nga si Daniel Muñoz.
Apang gilayon nga nagbalos ang Uzbekistan.
Sang ika-60 minuto, nakahimo sang history si Abbosbek Fayzullaev matapos niya mapagkit ang pinakauna nga goal sang Uzbekistan sa maragtas sang World Cup, nga nagpatabla sa iskor nga 1-1.
Wala man ginpabay-an sang Colombia nga magdugay ang selebrasyon sang kontra nga team bangud pagkaligad lang sang lima ka minuto, sang ika-65 minuto, si Díaz mismo ang nakaiskor agud ibalik ang advantage sang ila grupo.
Sa katapusan, ginselyohan sang Colombia ang ila kadalag-an paagi sa header sang substitute player nga si Jaminton Campaz sa ika-90+9 minuto sang stoppage time.
Bangud sa amo nga kadalag-an, nagapanguna nga solo ang Colombia sa Group K nga may tatlo ka puntos, samtang nagapadayon ang group stage sang FIFA World Cup 2026.
