KORONADAL CITY – Tuman nga ginkalipay sang 6th Infantry Division Philippine Army ang padayon nga pagsungka sang mga katapo sang komunista nga grupo kag nagabalik sa sabak sang gobyerno.
Ini makaligad nagsungka ang anom ka mga katapo sang New People’s Army sa probinsya sang Maguindanao kun sa diin sa impormasyon nga nakuha sang Bombo Radyo Koronadal, ang nasambit nga mga surrenderees ang ginalakipan sang isa ka team leader, medic, assistant medic, kag tatlo pa nga mga kaupdanan.
Ila man nga ginsungka ang mga armas nga ginalakipan sang M-16 rifle, Garand rifle, M79 rifle, kag caliber 45 nga pistola.
Suno sa mga rebelde, kakapoy, kagutom bangud sa covid-19 pandemic kag kahadlok sa mga opensiba sang gobyerno ang nagtulod sa ila nga magpanaog kag magsungka.
Ginbaton naman sila ni 6th ID Philippine Army commander Maj. Gen. Juvymax Uy kag ginpasiguro ang mga palangabuhian para sa ila pagbag-o sang kabuhi.
