KORONADAL CITY – Nasapwan nga wala na sang kabuhi ang isa ka 6-anyos nga bata nga babaye nga ginaaligar ginlugos antes ginpatay kag ginpaanod sa suba sa Barangay Bambad, Isulan, Sultan Kudarat pasado alas-8 kaina sang aga.
Sa eksklusibo nga interbyu sang Bombo Radyo Koronadal kay Alyas Efren, amay sang biktima, kagab-i pa nadula ang bata sini, Enero 27 apang kaina lamang nasapwan nga wala na sang kabuhi kag panapton nga ginasuksok.
Suno kay Efren, nagbisita sila sang iya asawa kag bata sa puluy-an sang ila iloy sa Purok Lupok, Brgy. Kolambog, Isulan, Sultan Kudarat agud magtambong sa isa ka birthday party tubtob nga nagab-ihan.
Sang mapuli na kuntani sila sa Brgy. Poblacion, Isulan, Sultan Kudarat ginpangita nila ang iya bata apang wala sini makita rason nga ginhambalan sini ang iya iloy.
Sa pagdahum nga kaupod lamang sini ang iya mga pakaisa nga babaye nga nagahampang nagpauli suno pa sila sang iya asawa nga wala nadala ang bata.Pasado alas-10 na kagab-i sang nagtawag ang iya iloy nga wala sa gihapon makita ang iya nga bata.Sa karon nagapadayon naman ang imbestigasyon sang kapulisan kag natalana nga ipaidalom sa autopsy ang bangkay sang biktima.
May ginadudahan naman ang pamilya nga responsable sa krimen apang ginasalig na nila sa mga otoridad ang pag-imbestigar agud madakpan ini.
Hustisya naman ang ginasinggitan sang pamilya sa natabo sa bata nga babaye.
